Það er tiltölulega stutt síðan Bylgja benti mér á þessa afburða tónlistarkonu frá Írlandi. Lagið sem kom mér af stað ber titilinn Caribbean Blue. Síðar gerði ég þá skemmtilegu uppgötvun að eitthvað af tónlist hennar rataði í kvikmyndir Peter Jackson um Hringadróttinssögu, en þær eru í miklu uppáhaldi. Ég átti svo langt og áhugavert samtal á kaffihúsi nýverið við írskan félaga minn. Hann lofaði konuna og var eilítið hneykslaður að ég hefði ekki kynnst tónlist hennar fyrr.
Nú er hún í nær látlausri spilun hjá mér. Meðal stakra laga sem mér eru einkar hugleikin má nefna áðurnefnt Caribbean Blue, Book Of Days, Anywhere Is, Only If, Lothlórien og Marble Halls. Svo skemmtilega vill til að fyrstu fjögur lögin koma einmitt fyrir í sömu röð á geisladiskinum Paint The Sky With Stars.
26. feb. 2007
Þessi færsla hefur verið lesin 669 sinnum
26. febrúar 2007 kl. 16:59
Ég er svo sammála þér að þetta er frábær tónlistarkona! En gott að þér hefur líkað tónlistin hennar
26. febrúar 2007 kl. 17:16
Hún er ein af fáum sem eiga heila hillu skilið undir safnið.
3. mars 2007 kl. 18:27
Ég verð nú að taka undir með írskum félaga þínum, ég er hálfhneykslaður yfir þessum seinagangi. Mínir diskar eru ónýtur eftir ofnotkun — fyrir mörgum árum!
Það er hættulegt að hlusta á þetta í langkeyrslu.
3. mars 2007 kl. 19:00
Þetta flokkast að sjálfsögðu undir skelfilegt hugsunarleysi og vítavert gáleysi. Ég hef þó rænu á að skammast mín.
Ég hlustaði einmitt á fyrrnefndan disk alla leiðina til höfuðborgarinnar í dag. Fannst það raunar hjálpa svolítið, en kvef og beinverkir hrjá mig umtalsvert.
En undir flestum kringumstæðum myndi ég alls ekki mæla með þessari tónlist á langferðalögum, a. m. k. ekki fyrir þann er situr undir stýri.