Föstudagurinn leið sársaukalaust fyrir sig í vinnunni, síðasta símtalinu svaraði ég fyrir síðdegiskaffi. Færði vinnufélögunum kort og kveðjur, og kvaddi alla með kurt og pí. Í dag tókum við saman pakka og pinkla, og undirbjuggum ferðalagið til Akureyrar. Bíllinn var sæmilega troðinn þegar við renndum úr hlaði frá Fífuseli. Andartaks stopp í Kópavoginum, einskonar tilraun til að gera óvænt góðverk fyrir jólin. Móttökurnar voru ósköp hlýlegar, enda ekki við öðru að búast af öðrum eins öðlingum. Svo hófst ferðalagið norður. Höfðum stutta viðkomu í Borgarnesi til að sækja nokkra pakka handa Dalvíkingum, og örlítið lengra stopp í Langadal til að bókstaflega troðfylla bílinn af kössum og pokum. Jafnvel aftursætin voru svo troðin af dóti, að Halldór sat nánast undir hrúgunni.

Nú ætla ég að spjalla ögn við hann Ares litla. Hann hefur haldið rúminu volgu nær sleitulaust frá því ég yfirgaf hann síðast fyrir borgina.

Þessi færsla hefur verið lesin 382 sinnum